گرووپی توێژینەوەی ئاسۆسافت
ئاسۆسافت (AsoSoft) گرووپێکی توێژینەوە و بازرگانییە و کار لەسەر تەکنۆلۆژیای پرۆسێسی زمانی سروشتی دەکات بۆ زمانی کوردی.
ئاسۆسافت گرووپێکی توێژینەوەیە کە لە لایەن مامۆستایان و خوێندکارانی کوردەوە دامەزراوە و لە بواری پرۆسێسی کۆمپیوتەریی زمانی کوردی چالاکی دەکات. زمانی کوردی یەکێک لەو زمانانەیە کە سەرچاوەی کەمی لە بواری زمانناسی و بە تایبەت زمانناسیی کۆمپیوتەریدا هەیە. ئەم گرووپە هەوڵ دەدات سەرچاوە و ئامێر بۆ پرۆسێسی کۆمپیوتەریی زمانی کوردی دابین بکات.
بۆ ئەو مەبەستانەی باس کران، چالاکییەکانی گرووپەکە جۆربەجۆرن کە بەشێک لە بەرهەمەکانی لەم خاڵانەی خوارەوەدا دەبینرێن:
تایپکردنی دەنگیی سەرهێڵ بۆ کوردی
مەبەست لە ئەنجامدانی ئەم پرۆژەیە، توێژینەوە و پەرەدانە بە بواری سیستەمی ناسینەوەی ئۆتۆماتیکی ئاخاوتن (Automatic Speech Recognition) بۆ زمانی کوردی ناوەڕاست بووە کە سەرەکیترین دەرەنجامەکەی داڕشتن و جێبەجێکردنی سیستەمێکی تایپی دەنگییە بۆ ئەم زمانە. بە یارمەتیی ئەم سیستەمە، بەکارهێنەران دەتوانن قسە بکەن و سیستەمەکە بە شێوەی ئۆتۆماتیک تایپی بکات. یەکێک لە گرنگترین قازانجەکانی ئەم بەرهەمە خێراترکردنەوە و ساکارکردنەوەی شێوازی تایپی دەقی کوردی و کاروبارەکانە.
سوودەکانی:
- ڕاستەوخۆ و بە شێوەی بەردەوام قسە بکە، سیستەمەکە بە خێرایی و بە کەمترین هەڵەوە تایپی دەکات.
- فایلی دەنگیشی پێ بدە لە چەند چرکەیەکدا بۆت دەکاتەوە بە دەقی نووسین.
- هەر ڤیدیۆیەکیشی پێ بدەیت، دەقی وتە کوردییەکانی دەکاتەوە بە دەقی نووسراوە.
خوێنەری سروشتی و خێرای دەقی کوردی
سیستەمی گۆڕینی دەقی نووسین بۆ ئاخاوتن (Speech Synthesis / Text-to-Speech) بریتییە لە بەرهەمهێنانی قسەکردنێک کە هاوشێوەی قسەکردنی مرۆڤە
سوودەکانی:
- بۆ خاوەن پێداویستی تایبەت (نابیناکان) یارمەتیدەرێکی گەورەیە بۆ خوێندنەوەی دەقی کوردی
- ڕێگایەکی زۆر ئاسانە بۆ فێربوونی خوێندنەوەی دەقی کوردی، بەتایبەت بۆ منداڵان و ئەو کەسە بیانییانەی کە دەیانەوێت فێری زمانی کوردی ببن
- ئەم سیستەمە زۆر بە سوود دەبێت بۆ خوێندنەوەی کتێبە کوردییەکان و دروستکردنی کتێبی دەنگی بۆ زمانی کوردی
هەڵەچنی وردبین و خێرا بۆ پێداچوونەوەی دەقی کوردی
«هەڵەچنی ئاسۆ» هەڵەچنێکی (Spell-Checker) سەرهێڵە کە یارمەتیی بەکارهێنەرە کوردەکان دەدات بە خێرایی و وردبینییەوە بە دەقەکانیاندا بچنەوە و هەڵەی ڕێنووسی و هەڵەی خاڵبەندی بە ئاسانی چارەسەر بکەن. هەڵەچنی ئاسۆ هەڵە ڕێنووسییەکان و خاڵبەندییەکانی دەقی کوردی دەستنیشان دەکات و هەندێکیان بە ئۆتۆماتیک چارەسەر دەکات و بۆ ئەوانی دیکەش پێشنیازی گونجاو دەخاتە بەردەستی بەکارهێنەر تا بە یەک کلیک ڕاستیان بکاتەوە.
سوودەکانی:
- هەڵەی ڕێنووسی دەستنیشان دەکات و پێشنیاز دەخاتە بەردەست بۆ ڕاستکردنەوەی
- هەڵە بەرچاوەکانی خاڵبەندی دەدۆزێتەوە و بەیەکجاری ڕاستیان دەکاتەوە
- نووسینە جۆربەجۆرەکانی وشەکان دەناسێتەوە و پێشنیاز بۆ باوترینیان دەدات